A TÚA BANDA DESEÑADA LILA

Para conmemorar o Día da Ilustración, Biblioquiroga e Donas de Si programaron un Obradoiro de ilustración e banda deseñada coa ilustradora Idoia de Luxán Vázquez que  propuxo  ao alumnado participante, a creación dunha banda deseñada con personaxes que desafiasen a discriminación por xénero, o machismo, o maltrato.

DÍA DA ILUSTRACIÓN

O 30 de xaneiro, coincidindo co nacemento de Castelao, celébrase o Día da Ilustración. Esta é unha iniciativa da Consellería de Cultura, Educación e Ordenación Universitaria da Xunta de Galicia en colaboración coa Asociación Galega de Profesionais da Ilustración (AGPI).

Cartel da ilustradora coruñesa XULIA PISÓN.

O protagonista deste ano é o ourensán Cándido Fernández Maza. Biblioquiroga presentou unha exposición sobre a súa vida e obra.

Doutra banda, Biblioquiroga en colaboración con Donas de Si fixo unha exposición dunha serie  obras ilustradas, na que reivindicou o traballo de diferentes ilustradoras. 

Os rapaces e as rapazas de 4º de ESO de Educación Plástica mostraron as súas creacións artísticas para celebrar o Día Da Ilustración.

DÍA DA NON-VIOLENCIA E DA PAZ

O 30 de xaneiro celebramos O Día Escolar da Non-Violencia e da Paz, esta conmemoración foi fundada en 1964 polo poeta e pacifista Llorenç Vidal, e conmemórase a morte de Mahatma Gandhi, asasinado a tiros por un fanático hinduísta.

A nosa biblioteca  realizou unha exposición de libros con esa temática. Na parte superior da exposición,  o alumnado deseñou  tarxetas coa palabra  PAZ en diferentes linguas. E na parte inferior decorou outras con  lemas e frases de personaxes famosos.

 

A IGUALDADE NON TEN TRUCO

No día de hoxe, 30 de xaneiro no noso centro tivo lugar unha charla-espectáculo,  temática sobre a igualdade, a cargo da maga Sara e do mago Carlos. Unha actividade dinámica, interactiva, que entre outras cousas salientou o papel das mulleres magas na historia. 

A través de este espectáculo intentouse concienciar ao alumnado da igualdade entre os homes e as mulleres e a non violencia na sociedade.

MADE IN GALIZA. UNHA XORNADA NO TEATRO

O día 28 de xaneiro o alumnado de 3º e 4º da ESO e Bacharelato desprazouse ata o Barco de Valdeorras e no teatro Lauro Olmo tiveron a oportunidade de asistir á montaxe teatral  de carácter cómico e retranqueiro a partir de diferentes investigacións sociolingüísticas e de relatos de Made in Galiza de Sechu Sende. Na obra dous  membros da LP, Language Planning, acaban de chegar a terras galegas coa finalidade de impoñer unha solución definitiva á problemática lingüística. O obxectivo final da actividade foi a de incitar a unha reflexión sobre determinados aspectos relacionados coas actitudes e comportamentos ante a lingua galega con respecto ao alumnado.

A OCA DAS CIENTÍFICAS

O xogo é unha modificación do xogo da oca, o alumnado preparou unhas tarxetiñas con preguntas sobre 12 científicas, que deben ir acertando para poder avanzar polo taboleiro. 

En canto ao taboleiro conten as imaxes das 12 científicas, cos debuxos feitos polo alumnado e tamén imaxes relacionadas coa comarca de Quiroga , como pode ser o albergue, a ponte sobre o Sil, un forno de cal,... 

Presentamos "A Oca das científicas"

BIBLIOBOLETÍN DE NADAL

Biblioquiroga presenta o seu BIBLIOBOLETÍN de NADAL coas  adquisicións e recomendacións de Biblioquiroga e das librarías do pobo.
Ademais da presentación das actividades da Biblioteca, Libromanía e Donas de Si, realizadas durante este trimestre.